Breaking News

Trending right now:
Description
 
Dec 31, 2013

2013ലെ ബെസ്‌റ്റ്‌ മിനിസ്‌റ്റേഴ്‌സ്‌ഔട്ട്‌, പുതു വര്‍ഷത്തില്‍ പുതിയ തെറി ക്വട്ടേഷന്‍ ടെന്‍ണ്ടര്‍ ക്ഷണിക്കും

പൊളിട്രിക്‌സ്‌
image
കേരളത്തിലെ ജയിലുകള്‍വരെ വൈ-ഫൈ ജയിലുകളാക്കി മാറ്റി ലോകോത്തര മാതൃകയാക്കി മാറ്റി ഈ വര്‍ഷത്തെ യുഎന്‍എയുടെ ഏതെങ്കിലും പുരസ്‌കാരം നേടേണ്ട തിരുവഞ്ചൂര്‍ രാധാകൃഷ്‌ണന്‌ ഹൈക്കമാന്‍ഡിന്റെ പുതുവല്‍സര സമ്മാനം. ആഭ്യന്തര സ്ഥാനം എടുത്തുമാറ്റി.

അദ്ദേഹത്തിന്റെ നേട്ടങ്ങള്‍ ഈയവസരത്തില്‍ സ്‌മരിക്കാതിരിക്കുന്നത്‌ മോശം.

അങ്ങനെ കേരളത്തിലെ പ്രമുഖ ചാനല്‍ 2013യില്‍ ബെസ്റ്റ്‌ മിനിസ്റ്റാറായി തിരഞ്ഞെടുത്ത തിരവഞ്ചൂര്‍ ഒരു വര്‍ഷം പൂര്‍ത്തിയാകുന്നതിന്‌ മുമ്പ്‌ ആ സ്ഥാനത്തു നിന്ന്‌ ഔട്ടായി. ചിലപ്പോള്‍ കണ്ണുകിട്ടിയതാകാം. കമ്യൂണിസ്റ്റുകാരെ സിംഹവാലന്‍ കുരങ്ങന്‍മാരെപ്പോലെ വംശനാശത്തിന്‌ വിധേയമാക്കുമെന്നും ശ്രേഷ്‌ഠ ഭാഷയായ മലയാള ഭാഷയില്‍ നിന്ന്‌ തന്നെ "ക" എന്ന വാക്ക്‌ നിഷ്‌കാസനം ചെയ്യുമെന്നുമൊക്കെയായിരുന്നു അന്ന്‌ ചാനല്‍ വെളിച്ചത്തില്‍ അവാര്‍ഡ്‌ ഏറ്റു വാങ്ങി ശ്രീമാന്‍ തിരുവഞ്ചൂര്‍ രാധാകൃഷ്‌ണന്‍ അന്നു പ്രഖ്യാപിച്ചത്‌.

ചാനലുക്കാരുടെ പുകഴത്തലില്‍ മയങ്ങി വെറും വണ്‍,ടൂ ത്രി എന്നു എണ്ണിയതിന്‌ ഇടുക്കിയുടെ സ്വന്തം മണിയാശാനെ പിടിച്ചു ഒരു വര്‍ഷമല്ലേ ജയിലില്‍ ഇട്ടത്‌. പ്രസംഗം പറയുമ്പോള്‍ പോലും പാപം ചെയ്യാന്‍ പാടില്ല എന്നുറച്ച നിലപാടില്‍ തിരുവഞ്ചൂര്‍ എത്രപേരെയാണ്‌ ജയിലില്‍ ഇട്ടത്‌. കമ്യുണിസ്റ്റുകാര്‍ ഡയറക്ട്‌ ദൈവ വിശ്വാസികളല്ലെന്നാണ്‌ വെപ്പ്‌. എങ്കിലും അവരുടെ കണ്ണീരു ദൈവത്തിന്‌ കാണാതിരിക്കുമോ?

നിരീശ്വരവാദികളെ മാത്രമല്ല ദൈവവിശ്വാസികളെയും തിരുവഞ്ചൂര്‍ പിണക്കി. തിരുവഞ്ചൂരിന്‌ ആഭ്യന്തരം കിട്ടിയപ്പോള്‍ ഏറ്റവും കൂടുതല്‍ തേങ്ങയുടച്ച്‌ സന്തോഷിച്ചത്‌ അങ്ങ്‌ ചങ്ങനാശേരി പെരുന്നയിലുള്ളവരാണ്‌. എന്നാല്‍ തിരുവഞ്ചൂര്‍ ചങ്ങനാശേരിയില്‍ വേറെ ചില നായന്മാരുടെ വീട്ടീല്‍ കരിക്ക്‌ കുടിച്ചപ്പോള്‍ തിരുവഞ്ചൂര്‍ മറന്നത്‌ ആരേയാണ്‌?
അന്നേ പറഞ്ഞതാണ്‌ സുകുമാരന്‍ നായര്‍ തിരുവഞ്ചൂര്‍ നിങ്ങള്‍ അനുഭവിക്കുമെന്ന്‌.

അപ്പോഴൊക്കെയോ ചാനലുക്കാരുടെ കൂടെ പാളത്തൊപ്പിയും അണിഞ്ഞും റാഗിക്കഞ്ഞിയും കുടിച്ചു മുള്ളും കല്ലുംതാണ്ടി നടക്കുകയായിരുന്നു നമ്മുടെ രമേശ്‌ കുഞ്ഞ്‌. ഒരുവശത്ത്‌ ജനസമ്പര്‍ക്കം മറുവശത്ത്‌ കേരളയാത്ര. കേരളയാത്ര നടത്തി രമേശ്‌ കുഞ്ഞു പൂഞ്ഞാറുകാരന്‍ സത്യവാന്‍ ജോര്‍ജിന്റെ ഹൃദയത്തില്‍ സ്ഥാനം നേടി. ഈ ഭൂമിയിലെ സകല ചരാചരങ്ങളെയും തിരവനന്തപുരം ഭാഷയില്‍ പറഞ്ഞാല്‍ തള്ളേ കലിപ്പ്‌ തോന്നിയാല്‍ തെറി പറയാന്‍ അവകാശമുള്ള നമ്മുടെ ചീപ്പ്‌ വിപ്പ്‌ ജോര്‍ജ്‌ സാറിന്‌ രമേശ്‌ ചെന്നിത്തല ക്വട്ടേഷന്‍ കൊടുത്തു. കേരളത്തിലെ പതിനാറു ചാനലുകളില്‍ ഒരേസമയം നിറഞ്ഞുനിന്ന്‌ ക്വട്ടേഷന്‍ തെറി വിളിച്ചു. ജോര്‍ജിനോട്‌ കളിച്ച മറ്റൊരു ബെസ്‌റ്റ്‌ മിനിസ്‌റ്റര്‍ ഗണേഷിന്റെ തലയും മാനവും താലത്തില്‍ എടുത്തു പൂഞ്ഞാറ്റിലെ തറവാട്‌ വീട്ടില്‍ കൊണ്ടുവച്ച ജോര്‍ജിനോടാണ്‌ തിരുവഞ്ചൂര്‍ ഏറ്റുമുട്ടിയത്‌.
പോയ മാനം പോട്ടെ മന്ത്രി സ്ഥാനമെങ്കിലും തിരിച്ചു തരാന്‍ ആവശ്യപ്പെട്ടു ഗണേഷ്‌ തേരാപാര നടക്കുവാന്‍ തുടങ്ങിയിട്ട്‌ കാലം കുറെയായി. 

ഗതി എന്തെന്ന്‌ ഗണേഷിനെ നോക്കി പഠിക്കാന്‍ തിരുവഞ്ചൂര്‍ ശ്രമിച്ചതുമില്ല, പാറ, മണ്ണ്‌ എന്നൊക്കെ പറഞ്ഞു വിരട്ടാന്‍ നോക്കി. അവസാനം തിരുവഞ്ചൂരിന്റെ കുടുംബത്തിന്റെ മാനവും പോയി. ബെസ്‌റ്റ്‌ മിനിസ്‌റ്റര്‍ തൊപ്പിയും ഉടുപ്പും കെപിസിസിയുടെ ആദിവാസി മൂപ്പന്‍ രമേശ്‌ ചെന്നിത്തല സ്വന്തമാക്കുകയും ചെയ്‌തതാണ്‌ ഈ വര്‍ഷത്തെ മറ്റൊരു വലിയ നേട്ടം. ഇനി അടുത്ത വര്‍ഷം ബാക്കി വിശേഷം.