Breaking News

Trending right now:
Description
 
Jan 08, 2019

ദളിത് ക്രൈസ്തവരുടെ സംവരണാനുകൂല്യങ്ങള്‍ പുനഃസ്ഥാപിക്കണം: സീറോ മലബാര്‍ സഭ അല്മായ ഫോറം

image
കൊച്ചി: ദളിത് ക്രൈസ്തവര്‍ക്ക് അരനൂറ്റാണ്ടു മുമ്പ് നഷ്ടപ്പെട്ട സംവരണാനുകൂല്യങ്ങള്‍ പുനഃസ്ഥാപിക്കണമെന്നും അതിനുള്ള വാഗ്ദാനം മുഖ്യധാരാ രാഷ്ട്രീയ മുന്നണികളുടെ പ്രകടനപത്രികയിലുള്‍പ്പെടുത്തണമെന്നും സീറോ മലബാര്‍ സഭാ ആസ്ഥാനമായ കൊച്ചി കാക്കനാട് മൗണ്ട് സെന്റ് തോമസില്‍ ചേര്‍ന്ന അല്മായ ഫോറങ്ങളുടെ സമ്മേളനം ആവശ്യപ്പെട്ടു. ദീര്‍ഘകാലത്തെ പ്രക്ഷോഭത്തിന്റെ ഫലമായി സിക്ക്-മുസ്ലീം-ബുദ്ധ ദളിതരുടെ ആനുകൂല്യങ്ങള്‍ പുനഃസ്ഥാപിച്ചുവെങ്കിലും ദളിത് ക്രൈസ്തവരുടെ അവകാശങ്ങള്‍ പുനഃസ്ഥാപിച്ചിട്ടില്ല.  കേന്ദ്രസര്‍ക്കാര്‍ തലത്തിലുള്ള വിവിധ അന്വേഷണ പഠന കമ്മീഷനുകളുടെ ശുപാര്‍ശകള്‍ കേന്ദ്രസര്‍ക്കാരും സുപ്രീംകോടതിയും ഇക്കാലമത്രയും പരിഗണിച്ചിട്ടില്ല.  സങ്കുചിതമായ രാഷ്ട്രീയ താല്പര്യങ്ങള്‍ മാറ്റിവെച്ച് കേന്ദ്രസര്‍ക്കാര്‍ ഇക്കാര്യത്തില്‍ ക്രിയാത്മകമായി പ്രവര്‍ത്തിക്കണം.  
    ഇക്കാര്യത്തിലുള്ള രാഷ്ട്രീയ സമ്മര്‍ദ്ദം ശക്തമാക്കാന്‍ കേരളനിയമസഭ കേന്ദ്രസര്‍ക്കാരിനോട് ആവശ്യപ്പെടണമെന്ന് സമ്മേളനം ഉദ്ഘാടനം ചെയ്തുകൊണ്ട് അല്മായ കമ്മീഷന്‍ ചെയര്‍മാന്‍ മാര്‍ മാത്യു അറയ്ക്കല്‍ പറഞ്ഞു. കാത്തലിക് ബിഷപ്‌സ് കോണ്‍ഫറന്‍സ് ഓഫ് ഇന്ത്യ ലെയ്റ്റി കൗണ്‍സില്‍ സെക്രട്ടറി ഷെവലിയാര്‍ വി.സി.സെബാസ്റ്റ്യന്‍ അദ്ധ്യക്ഷത വഹിച്ചു. അല്മായ ഫോറങ്ങളുടെ സെക്രട്ടറി അഡ്വ.ജോസ് വിതയത്തില്‍ അടുത്ത വര്‍ഷത്തെ വിവിധ ഫോറങ്ങളുടെ പ്രവര്‍ത്തനപദ്ധതികള്‍ അവതരിപ്പിച്ചു.  ഷെവലിയര്‍ സിബി വാണിയപ്പുരയ്ക്കല്‍,  വി.വി.അഗസ്റ്റിന്‍, അഡ്വ.റോയി ചാക്കോ, ഡോ.രാജു ആന്റണി, ഡെന്നി തോമസ്, സാബു ജോസ്, ജസ്റ്റിന്‍ മാത്യു, റാണി മത്തായി, മേരി എസ്തപ്പാന്‍, സെബാസ്റ്റ്യന്‍ വടശ്ശേരി, പി.എം.സണ്ണി, ബാബു പീറ്റര്‍, ലൂയിസ് കെ.ഡി. തുടങ്ങിയവര്‍ പ്രസംഗിച്ചു. 

ഫോട്ടോ അടിക്കുറിപ്പ്: 
സീറോ മലബാര്‍ സഭ അല്മായ ഫോറങ്ങളുടെ സമ്മേളനം സഭാ ആസ്ഥാനമായ കൊച്ചി കാക്കനാട് മൗണ്ട് സെന്റ് തോമസില്‍ അല്മായ കമ്മീഷന്‍ ചെയര്‍മാന്‍ മാര്‍ മാത്യു അറയ്ക്കല്‍ ഉദ്ഘാടനം ചെയ്യുന്നു. സെബാസ്റ്റ്യന്‍ വടശ്ശേരി, സാബു ജോസ്, അഡ്വ. ജോസ് വിതയത്തില്‍, ഷെവലിയര്‍ വി.സി. സെബാസ്റ്റ്യന്‍, പി.എം. സണ്ണി, റാണി മത്തായി, ഡെന്നി തോമസ്, വി.വി. അഗസ്റ്റിന്‍, സിബി വാണിയപ്പുരയ്ക്കല്‍, ജാന്‍സി ജോര്‍ജ്, ജസ്റ്റിന്‍ മാത്യു എന്നിവര്‍ സമീപം.