Breaking News

Trending right now:
Description
 
Aug 09, 2016

യാത്രക്കാരനെ വയര്‍ലെസ്‌ സെറ്റുകൊണ്ട്‌ തലയ്‌ക്കടിച്ച പൊലീസുകാരനെതിരെ കേസ്‌എടുത്തു

image ഹെല്‍മറ്റ്‌ പരിശോധനയ്‌ക്കിടെ ബൈക്ക്‌ യാത്രക്കാരനെ വയര്‍ലെസ്‌ സെറ്റുകൊണ്ട്‌ തലയ്‌ക്കടിച്ച്‌ ഗുരുതരമായി പരിക്കേല്‍പ്പിച്ച സംഭവത്തില്‍ കൊല്ലം എആര്‍ ക്യാമ്പിലെ പൊലീസുകാരന്‍ മാഷ്‌ ദാസിനെതിരേ കേസെടുത്തു. ട്രാഫിക്‌ പൊലീസ്‌ സ്റ്റേഷനിലെ ജോലിയുടെ ഭാഗമായിട്ടായിരുന്നു ഹെല്‍മറ്റ്‌ പരിശോധന.കൊല്ലത്തെ സ്വകാര്യ ആശുപത്രിയില്‍ കഴിയുന്ന ബൈക്ക്‌ യാത്രക്കാരന്‍ അഞ്ചുകല്ലുംമൂട്‌ സ്വദേശി സന്തോഷ്‌ ഫെലിക്‌സിന്റെ മൊഴി സിറ്റി പോലീസ്‌ കമ്മീഷണര്‍ സതീഷ്‌ ബിനോ രേഖപ്പെടുത്തിയിരുന്നു. തുടര്‍ന്നാണ്‌ ഈസ്റ്റ്‌ പൊലീസ്‌ കേസെടുത്തത്‌. പോലീസ്‌ കംപ്ലയിന്റ്‌ അഥോറിറ്റി ചെയര്‍മാന്‍ ജസ്റ്റീസ്‌ നാരായണക്കുറുപ്പും സന്തോഷിനെ ആശുപത്രിയില്‍ സന്ദര്‍ശിച്ചു. സംഭവത്തില്‍ പൊലീസിന്റെ ഭാഗത്തുനിന്ന്‌ ഗുരുതര വീഴ്‌ചയാണ്‌ ഉണ്ടായതെന്ന്‌ ജസ്റ്റീസ്‌ നാരായണക്കുറുപ്പ്‌ പറഞ്ഞു. യുവാവിന്‌ തലയ്‌ക്കുള്ളിലും ചെവിയിലും ഗുരുതര പരിക്ക്‌ സംഭവിച്ചിട്ടുണ്ട്‌. കേള്‍വിയും ഓര്‍മയും അടക്കമുള്ള കാര്യങ്ങളില്‍ വൈകല്യം ഉണ്ടാകാന്‍ സാധ്യതയുണ്ടെന്നു ഡോക്ടര്‍മാര്‍ വ്യക്തമാക്കിയിരുന്നു. പൊലീസുകാരന്‍ പ്രതിയായ സാഹചര്യത്തില്‍ സന്തോഷിനു സര്‍ക്കാര്‍ ചികിത്സാ സഹായം നല്‍കണമെന്നും അദ്ദേഹം നിര്‍ദേശിച്ചു. കൊല്ലം എസിപി ജോര്‍ജ്‌ കോശിയുടെ റിപ്പോര്‍ട്ടിന്റെ അടിസ്ഥാനത്തില്‍ സിറ്റി പൊലീസ്‌ കമ്മീഷണര്‍ സസ്‌പെന്‍ഡ്‌ ചെയ്‌ത മാഷ്‌ ദാസിനെതിരേ വകുപ്പുതല അന്വേഷണം ആരംഭിച്ചു. സംഭവത്തില്‍ കുറ്റക്കാരനായ പൊലീസുകാരനെതിരെ ജാമ്യമില്ലാ വകുപ്പുകള്‍ ചേര്‍ത്ത്‌ കേസ്‌ എടുക്കണമെന്ന്‌ സംസ്ഥാന മനുഷ്യാവകാശ കമ്മീഷന്‍ അധ്യക്ഷന്‍ ജസ്റ്റീസ്‌ ജെ.ബി. കോശി ആവശ്യപ്പെട്ടു. സംഭവത്തെക്കുറിച്ച്‌ അന്വേഷണം നടത്തി സംസ്ഥാന പൊലീസ്‌ മേധാവി 28ന്‌ രാവിലെ 11ന്‌ തിരുവനന്തപുരത്ത്‌ നടക്കുന്ന സിറ്റിംഗില്‍ വിശദീകരണം സമര്‍പ്പിക്കണമെന്നും അദ്ദേഹം നിര്‍ദേശിച്ചു.